ഖത്തറിൽ ഒരു കൊവിഡ് മരണം കൂടി, രോഗബാധിതരുടെ എണ്ണം തുടർച്ചയായ മൂന്നാം ദിനവും ആയിരം കടന്നു
ഖത്തറിൽ ഇന്നൊരു കൊവിഡ് മരണം കൂടി ആരോഗ്യ മന്ത്രാലയം സ്ഥിരീകരിച്ചു. മറ്റ് ഗുരുതരമായ ആരോഗ്യ പ്രശ്നങ്ങൾ ഉണ്ടായിരുന്ന, തീവ്രപരിചരണ വിഭാഗത്തിൽ ചികിത്സയിൽ ആയിരുന്നു 54കാരനായ ഖത്തർ സ്ഥിരവാസിയാണ് മരണമടഞ്ഞത്. ഇതോടെ രാജ്യത്ത് കൊവിഡ് ബാധിച്ചു മരിച്ചവരുടെ എണ്ണം 14 ആയി.
ഇന്ന് പുതിയതായി 1189 പേർക്കു കൂടി കൊവിഡ് രോഗം സ്ഥിരീകരിച്ചതായി ആരോഗ്യ മന്ത്രാലയം ട്വിറ്ററിലൂടെ അറിയിച്ചു. ഇതോടെ രാജ്യത്ത് ആകെ കൊവിഡ് ബാധിച്ചവരുടെ എണ്ണം 22520 ആയി. അതേ സമയം ഇന്ന് 254 പേർക്കാണ് അസുഖം ഭേദമായത്. ഇന്നലെയത് 129 ആയിരുന്നു. ഇതോടെ ആകെ രോഗം ഭേദമായവരുടെ എണ്ണം 2753 ആയി.
കഴിഞ്ഞ 24 മണിക്കൂറിനിടെ 3215 പേർക്ക് ടെസ്റ്റുകൾ നടത്തിയാണ് 1189 പേർക്ക് രോഗബാധയുണ്ടെന്നു സ്ഥിരീകരിച്ചത്. ഇന്നലെ 4096 പേർക്കു പരിശോധന നടത്തിയപ്പോൾ 1130 പേർക്കായിരുന്നു രോഗം കണ്ടെത്തിയത്. ഇതു വരെ 127769 പേർക്കാണ് രാജ്യത്ത് പരിശോധന നടത്തിയിരിക്കുന്നത്. ഇന്നത്തോടെ 2753 പേർക്ക് രോഗം ഭേദമായപ്പോൾ 19753 രോഗികളാണ് നിലവിൽ ചികിത്സയിലുള്ളത്.
Latest update on #COVID19 in #Qatarhttps://t.co/67CRpvwjCh pic.twitter.com/zuEhKqyZxr
— The Peninsula Qatar (@PeninsulaQatar) May 10, 2020
രോഗവ്യാപനം ഉയരുന്ന സാഹചര്യത്തിൽ ലക്ഷണങ്ങൾ കാണിക്കാത്തവർക്കു വൈറസ് ബാധ ഏറ്റിട്ടുണ്ടോയെന്നു കണ്ടെത്താൻ ഒരു സാമൂഹ്യ സർവേ മന്ത്രാലയം ആരംഭിച്ചിട്ടുണ്ട്. കഴിഞ്ഞയാഴ്ച 2500 ടെസ്റ്റുകൾ ഈ തരത്തിൽ നടത്തിയിരുന്നു. ടെസ്റ്റിൽ പങ്കെടുക്കാൻ ക്ഷണം ലഭിച്ചവർ അതിനോടു സഹകരിക്കണമെന്ന് മന്ത്രാലയം ആവശ്യപ്പെട്ടു.
അതേ സമയം രോഗികളുടെ എണ്ണത്തിൽ ആശങ്ക വേണ്ടെന്നാണ് മന്ത്രാലയം വീണ്ടും വെളിപ്പെടുത്തുന്നത്. പ്രതിരോധ നടപടികൾ വർദ്ധിപ്പിച്ചതിന്റെ ഭാഗമായാണ് കൂടുതൽ പേർക്ക് രോഗം കണ്ടെത്തുന്നതെന്നും ആളുകൾ സുരക്ഷാ നടപടികൾ പാലിക്കണമെന്നും ആരോഗ്യ മന്ത്രാലയം ഒരിക്കൽ കൂടി ആവശ്യപ്പെട്ടു.
