ലോഹക്കഷ്ണങ്ങൾ സ്വർണമെന്നു പറഞ്ഞു വിറ്റ് 15 ലക്ഷം റിയാൽ തട്ടാൻ ശ്രമിച്ച പ്രവാസികൾ പിടിയിൽ

വ്യാജ സ്വർണക്കഷ്ണങ്ങൾ നൽകി 1.5 ദശലക്ഷം റിയാൽ തട്ടിയെടുക്കാൻ ശ്രമിച്ചതിന് ഏഷ്യൻ സ്വദേശികളായ രണ്ട് പേരെ ക്രിമിനൽ ഇൻവെസ്റ്റിഗേഷൻ ഡിപ്പാർട്ട്‌മെന്റ് അറസ്റ്റ് ചെയ്തു.

വ്യാജ സ്വർണവുമായി ആളുകളെ കബളിപ്പിക്കുന്ന ചിലരെക്കുറിച്ചുള്ള വിവരങ്ങളുടെ അടിസ്ഥാനത്തിൽ, ഡിപ്പാർട്ട്‌മെന്റ് രൂപീകരിച്ച പ്രത്യേക സംഘം മമൂറ പ്രദേശത്തു നിന്നാണ് പ്രതികളെ പിടികൂടിയത്.

പുരാതന നിധികളാണെന്ന് തെറ്റിദ്ധരിപ്പിക്കാൻ 15 കിലോയോളം ലോഹക്കഷ്ണങ്ങൾ ഖത്തറിലേക്ക് കടത്തിയതായും പഴയ സ്വർണക്കഷ്ണങ്ങൾ പോലെ തോന്നിപ്പിക്കാൻ മറ്റ് വസ്തുക്കൾ കലർത്തിയതായും ചോദ്യം ചെയ്യലിൽ പ്രതികൾ വെളിപ്പെടുത്തി.

പിന്തുടരുന്ന നടപടിക്രമങ്ങൾ അനുസരിച്ച്, അംഗീകൃത സ്റ്റോറുകളിൽ നിന്ന് മാത്രം സ്വർണ്ണം വാങ്ങാനും വിൽക്കാനും ആഭ്യന്തര മന്ത്രാലയത്തിലെ അധികാരികൾ പൊതുജനങ്ങളോട് അഭ്യർത്ഥിച്ചു.